近年不少備受爭議的法庭案件，都以社會服務令的判刑告終，有人認為社會服務令的刑罰過輕，完全沒有阻嚇力，也有人認為服務令不過是掃掃街洗洗廁所，但究竟社會服務令具體內容是甚麽？政府提供的資訊甚為貧乏。本刊訪問了一位因為醉酒駕駛而被判120小時社會服務令的巿民，由他揭開社會服務令的神秘面紗，讓大家了解社會服務令是否足以讓犯事的人反思自己的錯誤，從黑變白改過自身。
文、圖：本刊記者
2019年對將近40歳的阿豪（化名）來說，是身心動盪的一年。去年夏天發生的事，他至今仍然歷歷在目。做玩具生意的他，去年中一場飯局後，因為飲了很多酒，不知就裏下「竟然」駕車回家，結果途中失控撞欄，全車幾乎盡毁。他當時沒有受傷，但就極醉。
2級醉駕被判120小時社服令
「我當時量度血液酒精濃度完全超標， 2級醉駕，只係差少少就第3級，第3級的話，幾乎肯定要坐監。」結果阿豪坦承過錯，法官判他120小時社會服務令，避過牢獄之災。
阿豪憶述當時情景：「上庭第一堂（聆訊）我即時認罪，不過法官不是立即判刑，他要看我的社會服務令報告，看看我是否適合做社會服務令，還是要坐監。」阿豪說，散庭之後他即日便要到社會福利署會見感化主任：「佢先同我傾偈，然後要我提供學歷證明、工作證明和銀行存摺記錄，用作評估我的人格。」結果感化主任認為阿豪初犯，適合履行社會服務令，建議時數則為80至160小時，結果法官取中間數，判他120小時。
每星期自選固定一天工作8小時
阿豪說，他的個案之後由另一位感化官處理：「佢問我邊日得，星期一至星期日都可以，要我選其中一日。」阿豪解釋，雖然服刑日是「任選」，但一旦選好便不可以改，而且每星期同一日都需要出席：「唔可以今個星期就星期日，下星期就星期三，係唔得嘅。」阿豪屈指一算，每次服刑8小時，即要出席15天才能做完120小時服務令。
「我被指派到學校髹油，基本上學校範圍內，欄杆、樓梯扶手、鐵絲網、牆身等等，總之可以髹的地方都要髹。我們一組12人，依我所見大部分人都是『衰』醉駕、打人、商業詐騙等等，沒有打劫強姦等的犯人。」
至於服刑時間，則每次朝9晚5共8小時，中間有1小時用膳時間：「食飯時間都計入服務令中，所以我們要一齊去食飯，食飯都有人睇住。」阿豪說，雖說9時開始工作，但「義工」通常都提早5分鐘到工作地點，準時9時正點名，由導師招呼新人及簡介工作內容後便開工。
遲到超過15分鐘不獲點名
阿豪特別強調，做社會服務令必須要準時到達工作地點，因為社會服務令對工作時數要求嚴格。
「就算你遲到只係1分鐘，都係遲。遲咗的時間不可以即日補做，要在全部時數完成後，額外再出席多一次，補回遲到未有工作的時間。」
不過，在阿豪15天的「工作」中，未見過有人遲到多過15分鐘：「遲到係好嚴重的事，如果遲多過15分鐘，（導師）就連報到點名都不幫你做，要你走。你遲到，監場的主任（導師）會通知負責跟進遲到者個案的（感化）主任，所以大家都好注重準時返工。遲幾分鐘係會有，但遲好多就未見過。
「之前有感化主任可能知我要因工出差，所以有同我講可以請假，但必須預早3、4日通知，如果係有病的話，就必須出示醫生紙，否則就當無故缺席，又會畀人質疑是否有心做。」阿豪說，在服刑的15個星期之中，的確有需要離開香港公幹，不過最後還是選擇留港履行社會服務令：「當揹住啲嘢喺身，你只會想快啲甩咗佢。社會服務令就是這樣，我寧願推掉周末的工作去做社會服務，就係希望快點完咗個服務令。」
工作期間開電話即被趕走
報到點名後，一日工作便告展開，阿豪說，開工第一件事就是關掉手提電話。
「講到明工作時間是不可以使用電話，阿Sir要你攞電話出來檢查，如果電話是開着，會即刻叫你走。」阿豪說，「叫你走」後果可以很嚴重，輕則是重新工作，重則可以被視為不適合社會服務令，有機會交回法庭改判其他刑罰，例如是即時入獄。
「電話開着都唔得，更不要說食煙等事啦！即使是飲水，都有特別規定。」阿豪說，他服刑的場所雖然有汽水機，但他們絕對不能使用，只能用學校的飲水機裝水飲，而且是指定一個飲水機裝水。
「自己要帶個水樽去斟水飲，飲之前一定要向阿Sir請示，得到批准後先可以飲。」阿豪嘆道，這方面真的有點像坐監，總之在工作期間每一個動作，都要先向主任請示，得到批准才可以做，飲水如是、上廁所亦如是：「我聽師兄講，有人試過做做吓嘢人有三急去『開大』，又無通知阿Sir，跟住仲同阿Sir頂撞，就畀阿Sir話無心做，趕走咗。」
監工權力大食飯規矩多
負責監督執行服務令的導師權力很大。
「我們每天完成工作後，負責監工嘅阿Sir都會寫份報告，向跟進我們個案的社會服務令主任講番我們的表現和評語，主任就會以此為根據，判斷我哋是否有心透過社會服務工作改過自己的行為。」阿豪說，工作表現欠佳，無故缺席者隨時無得做：「結果好嚴重，可能會加時間，但聽過有人完全唔聽指示，甚至係同阿Sir有爭拗，咁佢（社署）就會評估你是否適合做社會服務令。」
8小時工作，基本上有一次午飯時間和兩次各15分鐘的小息時間，9時開工，10時半小休，然後正午12時吃午飯，1時再開工，3時半小息，5時收工，日日如是。說到午飯，阿豪說午飯時間其實也在服刑期間，所以也有嚴格規定：「首先是一定要食，唔畀你唔食飯因為驚你餓暈。同埋一定要自己帶錢買飯，不可以借錢食飯，也不可請人食飯。」阿豪說，如果真的無錢的話，阿Sir就會請你走，無情講。吃飯是由阿Sir帶隊，到附近茶餐廳開餐，阿Sir會一齊食，「義工」坐一枱，阿Sir坐開，但都在他視線範圍內。
顧尊嚴隱瞞「罪犯」身份
被法庭判罰社會服務令的人，都會擔心被外界知道其「罪犯」身份，遭人報以歧視目光，阿豪說，社會福利署在保護他們身份方面也下了功夫。
「首先我們是着便服工作，阿Sir會畀一個『義工』牌我們掛在身上，不過牌上分了編號，比如是『義工6』，這樣又有點奇怪。」雖說社署會向學校職工說他們是義工，不會透露來歷，但阿豪覺得學校職員有可能知道他們的真正身份：「怎樣都知道一點吧，每星期都有一班人來髹油，有阿Sir睇住，不過佢哋又無對我們有歧視眼光，有時都會幫我們找東西。」
至於一同工作的服刑人士之間，阿豪說肯定不會變成好朋友、好兄弟，但始終有機會溝通，問及大家「衰」甚麼等等。
「因為做社會服務令，真係男女老少乜人都有，有『師奶』同我一樣衰醉駕，亦有少女因打架要做服務令。髹油工作不是人人識做，好似我起初都要人教，所以溝通係一定會有。」
對詐騙犯黑社會敬而遠之
即使大家坐在同一條船，但阿豪說也不是人人都會受歡迎，即使都是犯法，也要看犯了甚麼罪行，才決定是否和這些人熟絡。
「對於犯詐騙入罪的人，我們這些醉駕的是不會和他們傾談半句，因為我們只是鹵莽而犯法，但佢哋係存心害人。另外有些人本身可能係『黑底』，又係要小心，好似有個人同佢食過兩日飯，就問我放工去唔去佢個場飲酒同玩。我就可免則免啦，因為不知對方是甚麽人，識錯人隨時惹禍上身，總之做服務令期間就要小心，因為隨時可以搞到無得做，要坐監。」
學到做人要「有規矩」
整個訪問之中，阿豪最關注係「判番你坐監」。
「講真有邊個想坐監？能做服務令，梗係想避免入獄，希望透過做番啲社會服務，彌補自己過失。講真我雖然無撞到人，但都真係要負番責任，做完120小時。」除了害怕入獄，阿豪說更重要的是想「補償」：「我看見做社會服務令的人，都係好畀心機去做。我見過有啲案情比我嚴重，係好用心去做，因為佢想補償自己的過錯，幫番個社會。」
經過120小時的社會服務，阿豪說至少讓他學到做人應該「有番啲規矩」：「例如平時約人，遲到就遲到，但做服務令就是不能。」另外，一班犯了事的人一起工作，大家也會學懂團結，分工合作：「大家都唔識做，阿Sir交低的工作，大家要團結先可以完成，只要有一個人無心做，件事就做不成。」另外，阿豪說通常『衰過』的人來工作，都是守規則的，雖然總有些人會「有意見」，都是因為不習慣，後來習慣了，便會增添了一份服從性。
刑滿道別似《監獄風雲》
回想整件事，阿豪說：「對我來說印象當然深刻，由我撞車到上庭，期間自己都真係會驚，驚坐監。坐監點算？」前前後後兩個月，最終被判社會服務令不用坐牢，但阿豪仍會十分憂心，因為不知道社會服務令的實質內容，「係咪要掃街」？阿豪又回想，起初時實在很不慣，第一、 二次完成工作後回家「成個人散晒」，心想「仲有14日我點捱呀」！但後來慢慢習慣了，時間亦過得越來越快，到有一日累積完成120小時工作，換來導師最後一句話：「我們要見喺出面見，唔好喺呢度見。」甚有《監獄風雲》Feel。
時刻警醒不能重覆犯錯
「你估我完咗呢件事之後仲會不會中（醉酒駕駛）？我諗我自己唔會再中啦。因為再中的話，就算無撞車而只係『吹波』中咗，後果都唔會再係社會服務令咁簡單。」阿豪說，犯過法之後，才明白自己「好彩」：「好彩我無撞到人，如果撞到人後果真係不堪設想。呢樣係醉駕前，完全無諗過嘅。」
此事亦有令阿豪好好思考發生醉駕的真正原因﹕「其實如果當日有機會飲酒，之前就唔應該揸架車出去。我當日本來諗住如果飲酒，就放架車在街由得差人抄﹙牌﹚，但因為當我飲咗酒『斷片』﹐自己揸咗架車都唔知，結果搞成咁。」所以阿豪明言，經過120小時社會服務令後，會時刻提醒自己不能重覆犯錯：「呢樣係我完成服務令後向主任寫心得時寫低嘅，亦係真心話。」
